ANKARA (QHA) -

Dr. Ahmed İhsan Qırımlı Edebiyat Yarışı 2013-2014 senesi içün 18 Mayıs 1944 sürgüniniñ 70 yıllığı münasebetineñ 1783’ten başlap dünyağa darqalğan Qırımtatar halqınıñ muacerette yaşağan horluqlarınen 1944’te sürgün etilğen halqımıznıñ facialı devirlerni anlatqan aile ikâyelerine bağışlanacaqtır. İkâyeler bu mevzuda olmaq kerektir.

Qonqursnıñ qaideleri asttaki kibidir:
1- İştirakçiler  12-29 yaş arasında olmalı.
     Eserler eki yaş kategoriyasına köre qabul etilecekler:
    a) 17-29 yaş arası (doğum  tarihı 01.01.1984–31.12.1996 arası olğan gruppa)
    b) 12-16 yaş arası (doğum  tarihı 01.01.1997–31.12.2001 arası olğan gruppa)
2- Eserler Qırımtatar halqınıñ Milliy Qurultayı tarafından qabul etilgen latin elifbesinen qırımtatarca yazılması şarttır.
3- Yollanacaq eser yaki eserler, daha evel iç bir yerde ve iç bir usulnen neşir etilmemek kerektir.
4- Yarışqa bir qaç esernen iştirak etmek mümkündir.
5- Yarışnı teşkil etken teşkilâtlarnıñ idaresi, Yuqarı Şura ve yarış komissiyasına aza olğan şahıslarınıñ qorantalarına ait kişiler yarışqa iştirak etip olamazlar.
6- Yollanacaq eser, yarışnıñ İnternet saytında numayiş etilgen nümune eser qalıbı boyunca azırlanmalı.
7- Müracaatlar internet vastasınen e-poçtanen yapılacaq.
8- İştirakçiler eserlerinen beraber pasportlarınıñ ya da doğum aqqında şeadetnameleriniñ skanerden keçirilgen kopiyalarını ve qısqa tercimaillarını (avtobiografiyalarını/özgeçmişlerini) yibermek kerektirler.
9- 2013–2014 senesi yarışnıñ soñki müracaat tarihı – 2014 s. iyun (haziran) 31 künidir.
10- Yarışnı teşkil etken teşkilâtlar yarışqa yollanğan eserlerniñ, ğalebe qazanğan ya da qazanmağanlarına baqmayıp, neşir etüv hususında tam aq-uquqqa saiptirler.
11- Yarışqa birden ziyade eser yollağan iştirakçiler tek bir esernen ğalebe qazanabilecekler.
12- Yarışta ğalip tanılğan ilk 10 iştirakçi, mükâfatları berilmezden evel Yarış komissiyası tarafından mülâqattan (subetten) keçirilecekler, yalıñız mülâqattan (subetten) soñ mükâfat qazanğanlarnıñ adları ilân etilecek.

Mükâfatlar

Yarış komissiyası birinci, ekinci,  üçünci yerni qazanğan ve ümüt bergen laureatlarnan beraber millî mektepler ve millî sınıflardan qazanğanlarñı  belgileycek.


17–29 yaş kategoriyası içün mükâfatlar:
1-inci yer : 4000 $
2-inci yer : 2000 $
3-ünci yer: 1000 $

* Komissiya tarafından saylanğan 5 kişige rağbetleyici mükâfat berilecek.
* 12-16 yaş kategoriyasında olğan ve komissiya saylağan farqlı beş eserniñ müellifine laureat olaraq 200 $ para mükâfatı berilecek.
* Ayrıca millî mektepler ve millî sınıflardan komissiya saylağan farqlı 10 eserniñ müellifine mahsusen 100 $ para mükâfatı berilecek.

Müracaat: Yarışqa müracaat usulı e-poçtanen yapılacaqtır. Başqa usulnen yiberilgen ikâyeler yarışqa qoşulmaycaqtır.

Müracaatlar içün e-poçta adresi: muracaat@drkirimli.org

Eserler aşağıdaki talaplarğa köre hazırlanmalı:
Format: MS Word 2003 (*.doc); ariflerniñ şekli: Times New Roman; ariflerniñ büyükligi (punto): 12; satırlar arasındaki boşluq: 1,5 satır. İlk saifede eserniñ adı, iştirakçiniñ adı ve soyadı, doğum tarihı, cep telefonı nomerası, ev adresi, e-poçta adresi, oquğan mektebi (okulu)/çalışqan yeri kibi malümatlar yer almalı. Eserlerniñ kolemi, ilk saifenen beraberlikte eñ çoq 15 saife olmalı.

QHA